والله العظيم إنك مسكينه وماخذة مقلب بنفسك !

مساء الخير..

مدري يمكن اللي دفعني لكتابة هالموضوع.. نموذج أو نماذج متكررة بحياة كثيرين..وأنا منهم

خلونا نناقشه مع بعض..

خلونا نتكلم عن اللي تعتقد إن قوة الشخصية ببذاءة اللسان وسوء الخلق..

مادمنا بزمن انعكاس المفاهيم للأسف !!

خلونا نتكلم عن اللي تصلي وتصوم وتحج وتغطي وجهها وهي عند الله بسواد قلبها وسوء نيتها وظنها ماتسوى جناح بعوضة !

عن اللي تفسر كل موقف عفوي إنه عداء لها..

عن اللي تغار منك وتتمنى زوال نعمة غيرها وتعترض على حكم الله إذا حسدت وقالت ليش هم عندهم وأنا لا

سواء كان مال أو بنون أو شكل..

عن اللي إذا دفعتِ إساءتها بالإحسان فسرت تصرفك ضعف !

عن اللي تمد يدها بالغصب تصافحك وهي قاعدة بزعمها انتصرت عليك وماتقوم لك على بالها أهانتك !

عن

وعن

وعن

إلخ..

خلونا نصحح لهالمسكينات اللي ماعاد يفرقون بين الصح والغلط مفاهيمهم وناخذ أجرهم

رغم إن الصفة الغالبة والملازمة لهم (إنهم دائما على حق)..

وخلونا نتكلم عن عواقب تصرفاتهم عليهم..

وكم دعوة مظلومة صابتهم..وهم يفسرونها عين أو ابتلاء لأن الله يحبهم !!!!!!!!!<<حطوا تحت ذي الف خط..

..

أحاديث كثير يااخواتي وردت تتناول هالجانب المهم اللي للأسف الكفار والغرب تفوقوا علينا وهم بلا وازع !

ادخلوا المنتديات الأجنبية شوفوا فيه وحدة تتكلم عن علاقاتها الإجتماعية وان فلانه أو علانه مستقعدة لها

أنا ماالومكم انكم تتكلمون..أنا ألوم اللي دفعوكم للشكوى والقهر وهذا اللي اقصد انه مايصير برا ويصير عندنا للأسف !

هالأشكال الحقيرة اللي ماترتدع ولاتخاف من الله..لكن يمهل ولايهمل..

تمعني هالأحاديث :

(ليس الشديد بالصرعة إنما الشديد الذي يملك نفسه عند الغضب)

و

( إن الشيطان قد أيس أن يعبده المصلون في جزيرة العرب ، ولكن في التحريش بينهم )

و

عن أبي هريرة رضي الله عنه قال: سُئل رسول الله صلى الله عليه وآله وسلم عن أكثر ما يدخل الناس الجنة ، قال: ” تَقوى اللّه وحُسنُ الخُلُقِ ” ،

وتمعنوا بالحديث الجااااي زين زين..

تمعني ياللي تحسين ان لك هيبة وماينداس لك على طرف ياللي قانونك قانون الغاب وتاخذين الناس بالصوت وتنتشين نشوة شيطانية وتخاطبين عقلك الصغير من الداخل وتقولين أهاااا هذاني لادخلت المكان مااحد يتجرأ يرد علي لأني أسكتهم !

إدراكك الضئيل وانعدام خشية الله وتفكيرك الدنيوي المنقطع عن الآخرة خلاك تعتقدين إنك الأقوى وان سكوتهم لأنهم يخافون الله أو يراعون وجود كبار السن أو يخافون من حدوث قطيعة تخلي أعمالهم بسبتها ماترفع ماهو بنظرك إلا ضعف وخنوع !!

تمعني ياجاهلة :

هالحديث :

((يا عائشة إن من شر الناس منزلةً يوم القيامة من تركه الناس ، أو ودعه الناس ، اتقاء فحشه ))

واتقوا الله

وش بتاخذين من هالدنيا؟؟

وش استفدتِ من الحقد والغل والحسد إلا دعوات ولعنات تصب عليك بالثلث الأخير من الليل

ودين تسددينه من نفسك أو ذريتك لأن دعوة المظلوم ليس بينها وبين الله حجاب..

بقى إني أقول..

إن القوة بالأخلاق وبالترفع عن الصغائر بسهولة الإنسان ينحدر ويصير سوقي..لكن القمة لها أهلها..

لاتخذلين تربية أمك وابوك اللي تعشموا بك خير..والله ان ابوي دايم يقولي كلمة يكش منها جلدي لاذكرتها

(يابنيتي لايجي الردى منك)

ومااقول بموضوعي إني مثالية أو ادعي مرتبة ماوصلت لها..لا والله أنا أكثر منكم بحاجة لهالنصايح ولكن عزائي القاعدة الشرعية التي تبيح لأهل الخمور التناصح فيما بينهم.

عذرا للإطالة وركاكة الأسلوب

إن أحسنت فمن الله وإن أسأت فمن نفسي والشيطان

ربنا لاتجعل في قلوبنا غلا على الذين آمنوا..ومن أرادنا بسوء فأشغله بنفسه وأنت حسبنا عليه نعم المولى أنت ونعم النصير.

والله يكلؤكم بحفظه.